Во Домот на културата „Илинден”, Демир Хисар беше официјално отворена изложбата „Ченто – биографија низ фотографии” од авторот Рубинчо Белчевски, историчар – кустос советник. Изложбата е во соработка со НУ „Завод за заштита на спомениците на културата и Музеј”, Прилеп. Изложбата ја отворија авторот Рубинчо Белчески и директорот на Завод и Музеј – Прилеп, Горанче Цветкоски, а истата, ќе биде поставена до 18.4.2023 (вторник).
Историчарот Белчевски, конкретно се осврна да говори подетално за ликот и делото на големиот Македонец, борец, деец и политичар – првиот претседател на АСНОМ, Методија Андонов Ченто.
Белчевски, несомнено, максимално се посветил и макотрпно работел на неговото извонредно дело – фотомонографија, каде пошироката јавност има увид на богатиот и броен материјал од секаков вид. Презентацијата, односно изложбата на фотографии за ликот и делото на Ченто, кои се подредени хронолошки, собрани на едно место, има за цел да му овозможи на секој да го следи неговиот живот исполнет со голем број на активности, но и на фотографии кои „зборуваат” за „животот на Ченто и после смртта”.
Градоначалникот Најдовски, изрази голема благодарност до организаторите за тоа што беше удостoен да биде на отворањето на овој голем културно – историски настан.
– Ми претставува особена чест и задоволство што, денес, присуствувам на еден едукативен, културен и историски настан, а каде што преку изложбата ќе се запознаеме повеќе за најголемиот Македонец кој пожртвувано и храбро се борел за самостојна, независна и обединета Македонија. Од тука сакам да порачам до поновите генерации – достојно и со висок пиетет да го чуваат ликот и делото на визионерот Ченто, првиот претседател на Македонија кој остави неизбришлива трага во современата политичка историја. На Белчески срдечно му честитам за оваа огромно дело и во иднина му посакувам уште повеќе уметнички дела, преку коишто се афирмира и претставува македонската историја во вистинско и автентично светло. И понатаму, несебично ќе ги поддржуваме и интензивно ќе инвестираме во полето на културата, бидејќи, пред сè, таа е основата на едно општество, рече Најдовски.
Во знак на успешна соработка, Белчески, на директорот на Домот на културата, Славче Велјановски и на градоначалникот Најдовски, им врачи поклон книга – фотомонографија „Ченто – биографија низ фотографии”.
На денешното отворање, изложбата имаа прилика да ја погледнат ученици од основните општински училишта заедно со нивните наставници, како и раководители на локални институции и други останати граѓани.
