Како дел од неколкудневното чествување по повод 108 години од одржувањето на Смилевскиот конгрес (2-7 мај 1903 г.), во саботата, на 7 - ми мај о.г., во легендарното Смилево се одржа завршното чествување по повод овој голем настан од македонската национална историја.

На споменичните обележја на Смилевското средсело, во името на граѓаните на Демир Хисар. делегација на општината што ја предводеше градоначалникот г-н Тони Ангелевски, положи цвеќе. Положија цвеќе и претставници на Полициската станица во Демир Хисар кои 7 ми мај го слават како Ден на македонската полиција, Здружението за заштита на ликот и делото на Даме Груев од Битола и УМС од Битола.

Голем број претставници на јавните институции во општината Демир Хисар, Смилевци, претставници на Здруженијата „Даме Груев“ и резервните воени старешини на Македонија, ученици од сите основни и средното училиште, како и други гости од Демир Хисар и Битола, присуствуваа на големиот историски час посветен на Смилевскиот конгрес на кој говореше проф. д-р Ѓорѓи Малковски, историчар.

Ученици од ОУ „Даме Груев“ и „Гоце Делчев“ и средното училиште „Крсте П. Мисирков“ изведоа културно - уметничка програма.